A iniciativa, que conta coa dirección técnica da Fundación Arume e a colaboración da Consellería do Medio Rural da Xunta de Galicia, busca aumentar a resiliencia das árbores. A gran maioría da superficie rexistrada, preto de 4.700 hectáreas, atópase en terreos lucenses, consolidando a provincia como o foco principal das actuacións de protección.

O proceso de traballo comeza coa identificación e o mapeo das parcelas forestais por parte da Fundación Arume. Posteriormente, a Consellería do Medio Rural determina as zonas prioritarias de intervención, mentres que a empresa pública Seaga encárgase de aplicar os abonos foliares necesarios para mellorar o estado nutricional dos exemplares.

As aplicacións de fertilizantes, que teñen como obxectivo fortalecer as defensas naturais dos piñeiros, comezarán nas próximas semanas. O calendario de actuacións estenderase ata finais do verán ou principios do outono, axustándose ao ciclo biolóxico dos fungos para garantir a máxima eficacia do tratamento.