O Pleno do Concello de Lugo aprobou hoxe reformas fiscais con dous obxectivos principais: facilitar o acceso á vivenda en alugueiro e impulsar a actividade económica para favorecer a creación de emprego e a retención do talento local.
No ámbito da vivenda, a modificación fiscal contempla unha bonificación do 95 % no Imposto sobre Bens Inmobles (IBI) para os propietarios que incorporen as súas vivendas ao programa municipal Lugo Aluga. Esta iniciativa busca mobilizar inmobles para o alugueiro a prezos asumibles, ofrecendo garantías tanto á propiedade como ás persoas que buscan un fogar.
Por outra banda, as reformas fiscais tamén buscan favorecer a implantación de novas empresas e a ampliación das xa existentes no municipio. As bonificacións vincúlanse á creación de emprego, establecendo reducións de ata o 80 % no IBI, no Imposto sobre Construcións, Instalacións e Obras (ICIO) e no Imposto sobre Actividades Económicas (IAE), segundo as condicións das respectivas ordenanzas.
Estas medidas forman parte dunha política fiscal orientada a facilitar a mobilización de vivendas, apoiar a actividade empresarial e crear oportunidades laborais en Lugo, contribuíndo así a reter o talento local.
