O conselleiro de Educación, Ciencia, Universidades e FP, Román Rodríguez, presentou o proxecto de rehabilitación que actuará sobre os catro edificios do centro. O obxectivo principal é "mellorar o confort diario da comunidade educativa, ao tempo que se mellora a súa accesibilidade e eficiencia enerxética", cunha redución estimada de máis do 92% no consumo de enerxía e emisións de CO2.
A obra licitarase este mes de agosto e a previsión é comezar cos traballos a finais de ano, coa meta de que estea lista para o curso 2027/28. As actuacións comúns aos catro edificios inclúen o illamento de fachadas, a substitución de fiestras e portas, a instalación de luminarias led e luces de emerxencia, e a mellora de cubertas e accesibilidade.
Tamén se substituirán as caldeiras de gasóleo por biomasa. No edificio A abrirase unha nova aula e instalarase un ascensor adaptado; no B reubicarase a conserxería; no C ampliarase o comedor e a cociña; e no edificio da antiga escola, ampliarase a biblioteca e instalaranse aseos adaptados.
Ademais, construirase un novo patio cuberto de 309 m² e habilitarase un itinerario accesible continuo que conectará todos os edificios. A intervención tamén prevé a mellora das cubertas e a instalación de falsos teitos acústicos.
Por outra banda, o conselleiro e a alcaldesa de Lugo, Elena Candia, asinaron un convenio para que as instalacións deportivas dos institutos da cidade estean a disposición da cidadanía fóra do horario lectivo, unha iniciativa que o conselleiro cualificou como "un exemplo de colaboración institucional".
