O delegado territorial de Lugo, Alfonso Villares, realizou hoxe a súa primeira visita institucional ao Concello de Rábade. Alí, avaliou coa alcaldesa, Remedios González, algunhas das actuacións que promoven ambas administracións. Villares destacou o apoio do Goberno galego “no reforzo de servizos e dotacións para impulsar o tecido produtivo e fixar poboación”.
Entre as actuacións máis recentes, a Consellería do Medio Rural, a través de Agader, sufraga reformas en servizos básicos cun investimento de 100.000 euros. Estes fondos destinaranse á remodelación da antiga Praza de Abastos para mercado de produtos locais, á renovación da sinalización vertical e horizontal do casco urbano, e a traballos no patrimonio natural e cultural. Ademais, o Plan Camiña Rural achega 79.900 euros nas convocatorias 2025-26 e 2026-27 para o arranxo de pistas no municipio.
O obradoiro de emprego Cumes da Terra Chá IX executará nos próximos meses obras nos accesos, servizos e vestiarios do campo de fútbol municipal Catro Ventos. Este proxecto, compartido cos concellos de Begonte e Friol, conta cun orzamento de 544.500 euros da Consellería de Emprego, Comercio e Emigración.
O Goberno galego tamén achega 30.000 euros para a área de autocaravanas a través de Turismo de Galicia. Outras iniciativas financiadas inclúen 34.000 euros para obras de accesibilidade e novas salas na Casa Consistorial; 40.000 euros para labores na rede de saneamento e evitar infiltracións; e 60.000 euros para incrementar a eficiencia enerxética en instalacións municipais.
No ámbito dos servizos sociais, a Consellería de Política Social e Igualdade concede ao Concello 256.600 euros para o Servizo de Axuda no Fogar, o que supón un terzo máis que o ano anterior. A Consellería tamén sostén tres Casas Niño no municipio, que o pasado ano recibiron achegas por un total de 73.700 euros.
