A conselleira de Política Social e Igualdade, Fabiola García, reuniuse esta mañá co alcalde do Corgo, Felipe Labrada, para felicitalo pola adhesión do municipio ao proxecto de novas residencias de maiores impulsado polo Goberno galego. O Corgo será un dos municipios seleccionados para albergar un destes centros, que terá capacidade para un centenar de usuarios e complementarase cun equipamento similar no Páramo, con 30 prazas.
Acompañada polo delegado da Xunta en Lugo, Alfonso Villares, a conselleira destacou que un dos obxectivos desta iniciativa é evitar o desarraigo das persoas maiores e achegar os recursos ás zonas onde son necesarios. Na provincia de Lugo, está prevista a construción de catro residencias, unha delas no Corgo, que ademais de crear cen prazas de atención, xerará actividade económica e emprego no sector sociosanitario.
O proxecto da Xunta contempla a posta en marcha de 24 novos centros residenciais en concellos de menos de 25.000 habitantes, sumando máis de 1.800 prazas, das cales, como mínimo, o 60% serán de titularidade pública. A iniciativa tamén inclúe un centro comprometido en Ribeira.
Moitos concellos xa manifestaron a súa adhesión e algúns, como o Corgo, propuxeron opcións para os emprazamentos. A conselleira agradeceu a celeridade e asegurou que a Xunta acompañará aos municipios durante todo o proceso para axilizar os proxectos. O obxectivo é "facer realidade canto antes unha aposta que se resume en ofrecer aos galegos máis prazas residenciais, máis servizos e máis oportunidades", concluíu.
