Os xabarís continúan causando estragos na cidade de Lugo, provocando nas últimas horas "danos por miles de euros en instalacións municipais". A portavoz do Grupo Municipal Socialista, Ana González Abelleira, denunciou a "dejación de funciones manifesta e flagrante" da Xunta e a actitude "cómplice e sumisa" do goberno municipal presidido por Elena Candia.
En concreto, os animais causaron "estragos no sistema de rega recentemente instalado no corredor verde que atravesa a Avenida de Madrid" e importantes desperfectos no Parque de Rosalía de Castro. A concelleira socialista cifrou estes danos en "miles de euros" para as arcas municipais.
“"O peor que se pode facer é ocultar a realidade e intentar normalizar unha situación que xa é insostíbel. Lugo merece un goberno que reclame respostas e non que xustifique a pasividade da Xunta."
González Abelleira criticou directamente á alcaldesa Elena Candia por non "levantar a voz" ante a impunidade dos xabarís na cidade e a crecente preocupación veciñal. A socialista subliñou que o deber da rexedora local é "defender os intereses dos lucenses e esixir solucións inmediatas á administración competente", en lugar de actuar como "unha simple delegación do goberno autonómico".
Por todo iso, o PSOE reclama que o goberno local "informe con transparencia á cidadanía sobre a dimensión real desta problemática" e os danos ocasionados, concluíndo que "ocultar a realidade" e "intentar normalizar" unha situación insostíbel non é o camiño.
