A titular de Medio Rural resaltou hoxe o investimento de preto de 2,9 millóns de euros realizado polo Goberno autonómico nos últimos cinco anos para financiar proxectos que favorecen o desenvolvemento rural na comarca de Lugo. A conselleira fixo estas declaracións durante unha visita ao proxecto turístico Ecocamp San Román, situado no concello lucense de Guntín, que recibiu apoio da Xunta a través da intervención Leader.
Esta iniciativa recibiu unha achega económica de 167.000 euros a través do Grupo de Desenvolvemento Rural Comarca de Lugo, que opera nesta contorna e que impulsou un total de 16 proxectos dende o ano 2020. A conselleira Gómez subliñou que este tipo de iniciativas exemplifican a filosofía da medida Leader, centrada en poñer en valor os recursos endóxenos do territorio e, ao mesmo tempo, xerar riqueza e emprego no ámbito rural.
A conselleira lembrou que actualmente estanse resolvendo preto de mil solicitudes de axudas presentadas na última convocatoria do programa Leader. Esta convocatoria contou cun orzamento de 28,7 millóns de euros, converténdose na máis cuantiosa da historia. As achegas son plurianuais (2026, 2027 e 2028), o que permite un maior prazo para a execución dos proxectos.
O investimento total mobilizado por estes case mil proxectos supera os 140 millóns de euros. A maior parte destes proxectos son produtivos, como é o caso de Ecocamp San Román, orientados á actividade económica e á xeración de emprego. Das mil solicitudes presentadas, 227 corresponden á provincia de Lugo (un 23% do total). O GDR comarca de Lugo recibiu 33 solicitudes, das cales case o 79% foron para apoiar proxectos produtivos.
