A situación meteorolóxica en Galicia segue marcada pola ameaza das tormentas. Durante este sábado, a montaña de Lugo, así como as provincias de Pontevedra e Ourense, permaneceron baixo alerta amarela. De cara ao domingo, o aviso estenderase á totalidade do territorio lucense, segundo os datos facilitados polos servizos meteorolóxicos.
O episodio de calor e tormentas deixou rexistros térmicos elevados durante a xornada do sábado. Localidades como Vilanova de Arousa alcanzaron os 30,8 graos, marcando o valor máis alto da comunidade, seguidas por rexistros similares en puntos como Vedra ou Meis.
“"Con esta situación, espéranse ceos con intervalos de nubes e claros, crecendo progresivamente nubes de evolución que deixarán chuvascos tormentosos, máis probables na segunda metade do día."
Para este domingo, a previsión de MeteoGalicia non apunta a cambios significativos. Persistirá a entrada de aire cálido procedente de latitudes inferiores, o que manterá a inestabilidade. As temperaturas permanecerán estables, mentres que o vento soprará do nordés, con intensidade frouxa no interior e moderada na costa, chegando a intervalos fortes nas proximidades de Bares.
