Tras varios días de chegadas escalonadas, recoñecementos médicos e traballo individual, o conxunto dirixido por Luis Casimiro realizou a primeira toma de contacto real sobre a pista. A sesión matinal, que se estendeu dende as 10:00 ás 12:30 horas, serviu para comezar a asentar as bases físicas e tácticas do novo grupo.
A plantilla mantén unha parte importante do bloque da pasada campaña e incorpóranse novos xogadores como Rasir Bolton, Josep Peris, Tevin Brown, Edgar Vicedo e Aleksa Ilic. A eles súmanse Andersson García, pendente de trámites, e os xogadores que reforzarán os adestramentos iniciais: Víctor Arteaga, o mozo Néstor Viño e o pivote Ismael Tamba.
“"O pivote andaluz, que vén de xogar no Lucentum Alicante, volverá traballar ás ordes de Luis Casimiro, con quen coincidiu no Unicaja."
O primeiro día estivo marcado polo ritmo propio dun inicio, con exercicios físicos, de balón e as primeiras indicacións colectivas de Casimiro. A pretempada estará condicionada polas ventás FIBA, que provocarán as saídas de xogadores como Danko Brankovic, Dominik Mavra, Jonathan Kasibabu e Aleksa Ilic en poucos días.
Estas ausencias, especialmente no xogo interior, levaron ao club a incorporar temporalmente a Arteaga e Tamba para manter o nivel dos adestramentos. O Breogán completará a xornada cunha segunda sesión pola tarde, dende as 17:00 ás 18:30 horas, marcando oficialmente o inicio dunha preparación con importantes retos dende as primeiras semanas.
