A decisión implica a integración de dous equipos que operaban de forma separada baixo a anterior administración. Unha das brigadas dependía da concellaría de Infraestruturas, mentres que a outra, coñecida como Plan Áxil, fora creada con fondos da Deputación para abordar reparacións de rúas e mobiliario urbano.

A alcaldesa e o concelleiro de Mobilidade e Obras informaron sobre este cambio tras visitar as cinco brigadas municipais existentes: obras, sinalización viaria, servizos eléctricos, parques e xardíns, parque móbil e zona rural. Todas elas teñen a súa base nas naves do parque de Frigsa.

A brigada Áxil, contratada a unha empresa de economía social, comezou a operar a finais do ano pasado. A intención é rendibilizar ao máximo este equipo durante o tempo restante do seu contrato anual. A coordinación de ambos os equipos foi asignada a un enxeñeiro, liberando así a enxeñeira adxunta da xefatura de servizo para outras tarefas.

Segundo explicou o concelleiro, a análise do funcionamento previo das brigadas revelou que, en ocasións, ambos os equipos acudían á mesma reparación, mentres que noutras, as solicitudes quedaban sen atender ou se demoraban debido á diferente dirección política de cada unha. Esta disfunción, recoñecida tamén polo persoal municipal, orixinábase en que o departamento de enxeñaría dependía dun partido, mentres que a xefa adxunta estaba adscrita á alcaldía, en mans doutro.

O novo executivo busca unha maior eficiencia dos recursos e unha atención máis rápida ás necesidades da cidade, así como unha mellor coordinación con outras brigadas municipais. É habitual que, tras a intervención da brigada de augas nunha beirarrúa ou calzada, deba actuar a brigada de obras, ou que despois desta, sexa necesaria a intervención da de sinalización viaria. Ademáís, o Goberno local debe afrontar a caducidade do contrato de reparación de asfaltados, co obxectivo de restablecer este servizo canto antes.