A infraestrutura, que conta cun informe favorable de Patrimonio Natural, foi colocada en colaboración coa Federación Galega de Piragüismo. Segundo o goberno local, a plataforma demostrou ser unha ferramenta útil tanto para a práctica deportiva como para facilitar o acceso ao baño da cidadanía de xeito seguro.
Ante a orde de desmontaxe emitida pola Confederación Hidrográfica Miño-Sil, o consistorio presentou un recurso. O goberno municipal argumenta que resulta máis prexudicial retirar a estrutura flotante agora para volver instalala en outubro, cando se celebrará a seguinte proba deportiva, que mantela operativa durante o verán.
Pola súa banda, a federación de asociacións Lugo Rural Importa solicitou unha colaboración entre as institucións implicadas. O colectivo veciñal critica que se esixan requisitos administrativos que impidan o uso da zona de baño, instando a que a interpretación da normativa priorice o interese público e a convivencia entre organismos oficiais.
