O Presidente de ASPNAIS, José Reigosa García, reuniuse co Deputado de Formación, Ensino e Economía do Coñecemento, Miguel Fernández, para formalizar a firma dun novo programa de intervención psicolóxica. Este programa busca ofrecer acompañamento aos usuarios do centro na perda dun ser querido.
O acordo, selado este luns en Lugo, inclúe unha achega de 5.000 euros por parte da Deputación de Lugo para o desenvolvemento desta iniciativa. Miguel Fernández, en nome da Deputación, fixo entrega do acordo a José Reigosa, destacando a importancia desta axuda psicolóxica para as persoas usuarias do centro.
Durante o encontro, Miguel Fernández tamén recoñeceu a traxectoria de Aspnais, entidade que atende actualmente a 150 persoas e que celebra 60 anos de compromiso coa inclusión e o benestar desde a súa fundación en 1966 por un grupo de pais.
“"é especialmente complexa para eles"
O programa, financiado pola Deputación de Lugo, centrarase en ofrecer apoio psicolóxico aos usuarios que sufran a perda dun ser querido, unha situación que a Deputación considera "especialmente complexa para eles". A entidade prevé desenvolver sesións individuais e grupais, utilizando recursos como o debuxo, a escritura e técnicas de relaxación para facilitar a xestión emocional e a asimilación da perda.
