A planificación da Xunta de Galicia contempla un investimento de 10,1 millóns de euros destinados especificamente á provincia de Lugo. Estas intervencións buscan modernizar as infraestruturas de subministro, reducir as avarías e garantir a calidade da auga en municipios como Friol, Pantón, Vilamarín, Ribadeo, Trabada e Sober.
No caso concreto de Friol, formalizouse un convenio para dotar de servizo de auga potable á parroquia de San Paio de Seixón. O proxecto, cun orzamento superior aos 620.000 euros, inclúe a construción dun novo depósito na zona da Abelaira e a mellora das canalizacións de captación, beneficiando a máis de 70 vivendas e diversas explotacións gandeiras e negocios locais.
As actuacións, que contan con cofinanciamento do Fondo Europeo de Desenvolvemento Rexional (Feder), teñen como obxectivo reforzar a resiliencia dos sistemas municipais ante períodos de seca e garantir a continuidade do subministro. A estratexia de Augas de Galicia céntrase en renovar conducións antigas e solucionar problemas de presión ou perdas de auga en zonas rurais.
