A rexedora de Lugo, Elena Candia, manifestou que o novo goberno local será "moi contundente" ao demandar a recuperación das frecuencias ferroviarias perdidas, con especial énfase na liña a Barcelona. Candia considera que a modificación do horario dun tren, en referencia ao Alvia madrugador que conecta a cidade coa capital dende esta semana, resulta "insuficiente".
Nunha rolda de prensa, a alcaldesa matizou a súa postura sobre o novo servizo. "Cando se anunciou que se modificaba o horario dun tren e se adiantaba para chegar a Madrid nun horario que nos permitise ter máis marxe de manobra e incluso planificar a volta no mesmo día, nós aplaudímolo, porque é unha mellora, pero dixemos claramente que nos parecía unha proposta moi pouco ambiciosa", declarou.
A rexedora insistiu nas demandas pendentes da cidade. "Seguimos demandando máis frecuencias. Seguimos demandando a conexión efectiva coa alta velocidade. Seguimos demandando que se recupere o tren a Barcelona", enfatizou Candia, quen engadiu que a cidade nin sequera recuperou as conexións que tiña anteriormente.
Estamos cunhas frecuencias que son absolutamente insuficientes
Neste sentido, lamentou a contradición de que Lugo estea a piques de dispoñer dun "edificio propio do noso século", en alusión ás avanzadas obras da estación intermodal, mentres mantén "unhas frecuencias que aínda son do século pasado".
Candia tamén fixo referencia a "algún vídeo" difundido en "redes sociais" no que aparecen o secretario xeral do PSdeG, José Ramón Gómez Besteiro, e o voceiro socialista local, Miguel Fernández, subíndose ao tren madrugador o primeiro día do seu funcionamento. Para a alcaldesa, esta "mellora seguirá sendo insuficiente se non temos unha conexión real e efectiva coa alta velocidade e se non temos máis frecuencias", independentemente da "escenificación e por moitos madrugones que se peguen para facer un vídeo".
"Non nos podemos dar por pagos con que se adiante unha frecuencia existente. Temos que ser máis ambiciosos", insistiu a alcaldesa. Finalmente, concluíu que "as infraestruturas son a materia pendente da cidade" e prometeu contundencia dende a "lealdade institucional".
