A directora xeral de Xuventude, Lara Meneses, destacou hoxe o éxito da campaña de verán da Xunta na provincia de Lugo, que este ano ofrece máis de 1.960 prazas nos campamentos 'Modo Verán Activo'. Durante a súa visita aos campamentos xuvenís Multiaventura: ambiente e mar e Acampada a carón do mar, en Ribadeo, lembrou que a oferta total na Comunidade Autónoma ascende a 11.932 prazas, 302 máis que o ano anterior, a maior cifra histórica.
A representante da Consellería de Cultura, Lingua e Xuventude, acompañada polo delegado territorial da Xunta en Lugo, Alfonso Villares, subliñou a importancia de proporcionar á cativada e mocidade propostas que axuden a combinar o ocio coa educación non formal, a través de actividades culturais, ambientais, deportivas ou culinarias.
As instalacións de A Devesa (Ribadeo) acollen tres campamentos: Multiaventura: ambiente e Mar, Acampada a carón do mar e Endevésate co mar. Estes campamentos, con sete quendas ata o 7 de agosto, congregan preto de 500 rapaces e rapazas que participan en actividades náuticas como surf ou bodyboard, de aventura e natureza, escalada, slackline, tiro con arco e cometas de tracción, ademais de xogos e tempo libre na praia. Do 27 ao 30 de agosto, as mesmas instalacións acollerán o campamento Surf na Mariña, con 40 prazas para mozos e mozas de entre 18 e 30 anos.
Meneses tamén visitou o campamento Naturarea: Ambiente Mariño e Naútica, no Albergue Xuvenil de Area, en Viveiro. Alí saudou á segunda quenda dun programa que conta con cinco quendas e 500 prazas, ofrecendo actividades náuticas, mariñas e deportivas, saídas á praia e excursións.
A modalidade de campamentos, para nenos e nenas de 9 a 17 anos, é a que máis prazas achega á campaña 'Modo Verán Activo', con 8.050 repartidas en 36 instalacións. Complementan a oferta os minicampamentos 'Coñece Galicia' (876 prazas), propostas de ocio educativo para persoas de 18 a 30 anos (160 prazas) e os campos de voluntariado (815 prazas), estes últimos para maiores de 18 anos e abertos a participantes doutras comunidades e do estranxeiro.
Ademais da oferta directa, a Consellería de Cultura, Lingua e Xuventude cedeu 1.270 prazas de instalacións xuvenís a asociacións, entidades prestadoras de servizos á mocidade, escolas de tempo libre e corporacións locais para a realización dos seus propios programas de verán.
