Besteiro tamén ironizou sobre a posibilidade de que Alfonso Rueda abra un expediente disciplinario a Candia polos seus estatutos sobre mocións de censura con "tránsfugas", e mostrouse convencido de que o "rexeitamento" cidadán a "prácticas de quen chega pola porta de atrás" se reflectirá nas urnas.
O líder socialista situou o comité federal do PSOE, convocado para o vindeiro domingo 27 de xuño, como "punto de partida" para os procesos de primarias que designarán aos candidatos socialistas ás municipais nas cidades galegas, procesos que confía que se desenvolvan "con certa rapidez".
A pesar de que falta menos dun ano para os comicios locais, Besteiro considera que aínda hai "marxe" para decidir os cabezas de cartel, mesmo en prazas clave como Santiago, onde a militancia terá a última palabra, aínda que el percibe "a necesidade da cidadanía de que volte ese partido socialista que foi sobre o que brillou Compostela".
Como xefe de filas do PSdeG, Besteiro asume "cunha total corresponsabilidade" o compromiso en cada proceso electoral, apelando á "lealdade" e a "traballar fondamete" para obter o maior respaldo posible.
Respecto a unha posible candidatura ao Congreso, Besteiro afirmou que o seu "compromiso está coas cousas de Galicia", como o financiamento autonómico e proxectos de infraestruturas, e lamentou o voto en contra do PP e Vox á transferencia da AP-9.
Instou a Alfonso Rueda a "comportarse como presidente da Xunta" e defendeu que o mandatario galego "está máis sometido os intereses de Alberto Núñez Feijóo" que á defensa dos galegos, criticando a súa falta de diálogo co Estado sobre o financiamento autonómico.
