Álex Ortiz, preparador do conxunto lucense, valorou positivamente o resultado e a actitude do equipo no partido disputado en Barreiro. "Estou contento sobre todo porque neste partido demos unha imaxe diferente á que tiñamos dado nalgún dos últimos", asegurou, á vez que eloxiou "o esforzo que fixeron os xogadores" e o gol de Reniero, quen "entrou esta vez dende o banco e tivo tamén unha actitude moi boa".
O técnico recoñeceu o alto nivel do Celta B, un dos mellores equipos da competición, o que condicionou o seu plan táctico. "Sabíamos que non podiamos plantexarlle un partido no que ir alto a roubar. Por momentos, pero non durante longos tramos, puidemos quitarlles o balón", analizou.
Ortiz desvelou que a delicada situación psicolóxica do equipo propiciou a decisión de xogar cun bloque medio baixo e defender con liña de cinco, buscando saír en transición. "O estado mental no que estamos agora mesmo, no sentido de que non nos terminan de saír as cousas como nos gustaría, fai que propuxésemos un bloque medio baixo", explicou, concluíndo que, a pesar das ocasións do rival, "en liñas xerais, vámonos contentos co traballo do equipo".
Respecto ao regreso de Caballo ao once inicial, Ortiz detallou a súa recuperación tras unha longa lesión. "Diego estivo moito tempo lesionado e a semana pasada, na que tivemos o problema dos laterais, el intentou arriscar e forzar durante a semana. Decidimos non metelo no once por estar tanto tempo parado e sen competir. Volveu completar unha moi boa semana de traballo e creo que é un merecido premio tamén a volta despois de tanto tempo sen xogar", aplaudiu.
Tamén puxo en valor a achega dos canteiráns como Tomás e Aday. Sobre Tomás, do filial, indicou que "aínda que cometeu algún erro, é normal, é un rapaz moi novo e non estaba nun escenario nin moito menos fácil", xustificou o seu labor. De Aday, destacou que "cando tiña o balón, atrevíase a facer cousas" na primeira parte, aínda que na segunda "lle estaba custando moito facer esas axudas". "É un rapaz que tamén adestra fenomenal, que é un compañeiro excelente, ten personalidade e que cando ten que ter o balón non lle queima", eloxiou, subliñando o seu potencial de crecemento para o club.
Finalmente, o adestrador fixo un balance "agridulce" da tempada. "No cómputo xeral non estamos contentos porque deixamos escapar algúns partidos nos que si ou si tiñamos que sacar máis puntos". Engadiu que "os momentos de felicidade son efémeros" e que os malos momentos "son moito máis difíciles de quitarse de enriba". "Quedamos con esta pequena alegría. Os xogadores tamén merecían cambiar un pouco a imaxe do último partido. Pero queda competir o último partido en casa e oxalá aí si que poidamos darlle unha vitoria e unha boa imaxe á afección para concluír a tempada".
