A produción, inspirada nas redes de narcotráfico galegas, volve captar a atención da audiencia tras o éxito da súa primeira tempada, que se converteu na serie de fala non inglesa máis vista en Netflix na súa semana de estrea, acadando o número un en 28 países e situándose no Top 10 en 82 territorios.
Esta nova entrega, composta por seis episodios, continúa poñendo a Galicia no foco, abordando un dos temas que máis interese xera entre os espectadores: o mundo do narcotráfico. Un dos puntos fortes da serie, producida por Vaca Films, é a coidada selección dos seus escenarios.
A produtora Emma Lustres destacou a importancia de rodar na costa pontevedresa, elixindo localizacións como Cambados, O Grove, Sanxenxo, Vilagarcía e a capital provincial, Pontevedra. Non obstante, a trama tamén se estende a outras paisaxes galegas, incluíndo a Ribeira Sacra e a costa da Coruña.
A referencia ao festival de Viveiro xorde nunha escena onde dous personaxes, Daniel e Nilo, interrogan a un sospeitoso. Este último xustifica a súa ausencia nun lugar clave alegando que estaba no Resu. Tras a confusión inicial dun dos personaxes, aclárase que se trata dun "festival moi potente de jevis" que se celebra en Viveiro, mostrando incluso un vídeo como proba.
“"Si esta serie ya era un éxito, ¡con nosotros en la trama, normal que estén en lo más alto del top de series!"
Os organizadores do Resurrection Fest non deixaron pasar este detalle, celebrando a aparición do festival no terceiro episodio da segunda tempada da serie a través das súas redes sociais. A tempada actual conta coa incorporación do actor Luis Zahera, quen se une a un elenco xa consolidado con figuras como Clara Lago e Tamar Novas, entre outros.
