A ruta migratoria das candorcas (Orcinus orca) converterá o litoral galego nunha zona de paso nos vindeiros meses. Ante o aumento de interaccións entre estes cetáceos e as embarcacións nos últimos anos, o Goberno desenvolveu un mapa que indica as áreas con maior probabilidade de encontros. Esta ferramenta baseouse nos datos recollidos pola Sociedade de Salvamento e Seguridade Marítima (SASEMAR) entre os anos 2022 e 2025.

Os seguimentos realizados polos Centros de Coordinación de Salvamento Marítimo revelan unha diminución dos encontros no sur de España, mentres que en Galicia se rexistrou un incremento. As zonas de Fisterra, Arousa e a Costa da Morte son as que presentan unha maior probabilidade de interaccións.

As candorcas seguen os movementos do seu alimento principal, o atún. Coa chegada do verán, continuarán a súa migración cara ao norte da costa atlántica dende o Golfo de Cádiz. O Ministerio de Transición Ecolóxica e Reto Demográfico (MITECO) aconsella evitar a navegación nas zonas de maior densidade entre xullo e outubro. Esta recomendación xa está vixente no Golfo de Cádiz e no Estreito de Xibraltar.

En caso de avistamento ou interacción, recoméndase que a embarcación se dirixa cara á costa, buscando augas menos profundas. As persoas a bordo deben evitar as bandas e situarse en áreas que ofrezan maior protección ante movementos bruscos. O MITECO subliña a importancia de non realizar condutas que poidan causar “morte, dano, molestia ou inquietude aos cetáceos”. Despois de calquera avistamento, é fundamental notificalo ao Centro de Coordinación de Salvamento (CSS) máis próximo.