A parroquia de San Pedro de Redonda, en Corcubión, ultima os preparativos para a terceira edición da feira Saber Sabor da Aldea, que se celebrará este sábado, 1 de agosto, no campo de San Roque. A xornada busca recuperar e transmitir coñecementos, oficios e sabores tradicionais, ademais de servir de encontro entre as diferentes aldeas da parroquia.
O recinto contará con casetas de madeira onde se expoñerán ferramentas, maquinaria, utensilios domésticos, roupa e sementes empregados nas aldeas hai uns 70 anos. A feira tamén acollerá demostracións de artesáns como un cesteiro, un artesán de tamborís e pandeiretas, unha elaboradora de sombreiros de palla e unha oleira, que amosarán técnicas de traballo coa madeira, a palla, o coiro, o barro e a construción de instrumentos musicais.
A gastronomía tradicional será outro dos atractivos, con sardiñas, empanada, carne, xamón, café de pota, cervexa, viño e refrescos. Destacará a broa elaborada con millo do país, cuxa preparación se realizará nun muíño restaurado pola veciñanza e moído coa forza da auga, cociñándose posteriormente nun forno tradicional.
Tamén se poderán degustar filloas á pedra e follados con touciño, ademais de xeados e iogures de quilómetro cero da Granxa Moreira de Frixe. A xornada completarase con xogos, música e baile tradicional, e a comida e bebida correrán a cargo da Tasca O Fumeiro.
