A formación nacionalista subliña a necesidade de actuar con celeridade, especialmente despois da instalación de dúas marquesiñas para as paradas de autobús na zona. Segundo o grupo municipal, a medida máis lóxica sería complementar estas infraestruturas con pasos de peóns que garantan a seguridade dos viandantes.
Esta demanda xa foi trasladada ao Parlamento galego a través dun deputado do BNG. Ademais da creación de pasos de peóns, a proposta inclúe a redución do límite de velocidade na AC-445 de 70 km/h a 50 km/h, co obxectivo de minimizar riscos.
“"Logo de que se instalasen dúas marquesiñas para as paradas de autobús, o máis lóxico é que se proceda a habilitar pasos de peóns."
Os nacionalistas lembran que a praia de Estorde, situada a escasos metros da vía AC-445, rexistra unha alta afluencia de persoas durante a época estival. Por iso, consideran "preciso e urxente" dotar a zona de pasos de peóns, seguindo o exemplo doutros tramos onde se implementaron solucións similares ante necesidades idénticas.
O BNG agarda que a Xunta tome medidas efectivas nesta ocasión e evite que se produzan accidentes graves, facendo referencia a sucesos pasados noutros puntos da comarca como a recta da Anchoa, en Fisterra.
