O servizo de Gardacostas de Galicia, dependente da Consellería do Mar, retirou 371 nasas fondeadas de xeito irregular na última semana de controis e inspeccións desenvolvidos por terra e mar na costa galega.
Ademais destas artes para crustáceos e cefalópodos, o persoal de Gardacostas incautouse de 63 cacharros para a captura de polbo na ría de Muros-Noia, 500 metros de aparellos de enmalle (400 metros de trasmallo e 100 de vetas) na ría de Vigo, 10 viveiros de rede nos portos de Ribadeo e Ortigueira, un salabardo e un restrelo de man en Barallobre.
No referente ás capturas comisadas, os axentes requisaron máis de 190 quilos de marisco e peixe variado. Destacan preto de 126 quilos de polbo interceptados en zonas como o Berbés, Fisterra, Muros-Noia ou a ría de Corcubión. Tamén se incautaron máis de 31 quilos de centola en Mugardos, Ribadeo ou Alcabre, preto de 17 quilos de ameixa xaponesa e rubia, ademais de cantidades menores de calamar, lumbrigante e nécora. As especies vivas foron devoltas de xeito inmediato ao mar.
Durante o mesmo período, a Unidade Operativa de Servizos Centrais actuou na lonxa de Corcubión, onde se levantou unha acta de presunta infracción e foron incautados 4.000 quilos de bocarte, entregados a un centro benéfico.
Estas intervencións continuadas forman parte da vixilancia permanente da Consellería do Mar para combater prácticas irregulares, protexer os recursos mariños e amparar aos profesionais do sector que cumpren coa normativa vixente.
