A compañía UFD, a distribuidora eléctrica de Naturgy, vén de culminar a posta en servizo da nova liña soterrada de media tensión na zona de Sequeiro, na estrada AC566. A intervención, na que se investiron arredor de 200.000 euros, tivo como obxectivo modernizar as infraestruturas eléctricas da zona e mellorar a calidade e fiabilidade da subministración.
Os traballos permitiron soterrar a liña de media tensión, retirar un total de 9 apoios eléctricos e renovar dous centros de transformación (CT). A nova liña xa se atopa enerxizada e en servizo desde onte, o que permitiu retirar os grupos electróxenos que se utilizaron para garantir a subministración durante as obras.
Esta actuación enmárcase no plan de UFD para reforzar e modernizar a rede de distribución eléctrica en Galicia, incrementando a súa capacidade, fiabilidade e resiliencia.




