A cidade da Coruña acolle por primeira vez a XIII Festa do Primeiro Aceite de Jaén, un evento organizado pola Deputación de Jaén coa colaboración de 35 empresas xienenses. A cita estará aberta ao público nos Xardíns de Méndez Núñez ata este domingo, ofrecendo un amplo programa de actividades gratuítas e oferta gastronómica con produtos de primeira calidade.
A alcaldesa, Inés Rey, destacou a aposta da cidade polos atractivos turísticos e culturais sostibles e variados, e sinalou que "recibimos coas mans abertas iniciativas como esta feira". Pola súa banda, o deputado provincial de Jaén, Paco Reyes, fixo fincapé na calidade dos aceites temperáns xienenses, que "é de cor esmeralda brillante e un verdadeiro festival para os sentidos".
Durante as tres xornadas, as casetas acollerán degustacións, incluídas catas profesionais, exposicións e venda de aceite e outros produtos derivados do olivar. Ademais, haberá varias actuacións de música flamenca a cargo de Carmen Álvarez e o coro e grupo de baile da Casa de Andalucía da Coruña.




