O encontro, organizado polo Concello e a Asociación de Emisoras Municipais Galegas (EMUGA) dentro do programa “Enterrar o espírito da guerra e os discursos do odio”, terá continuidade mañá mércores no CPI de San Sadurniño, cunha actividade dirixida ao alumnado de 3º e 4º da ESO. A programación proseguirá o sábado á tardiña cun acto na Casa do Concello no que se descubrirá unha placa en memoria das vítimas do franquismo.
A presenza dos primeiros aparellos de radio nas casas, a chegada da programación radiofónica ás parroquias e o costume de escoitar os programas en familia ou nas vivendas veciñas centraron boa parte da conversa desta mañá. As persoas participantes reconstruíron lembranzas como a primeira vez que escoitaron a radio, o seguimento colectivo das radionovelas ou as visitas ás casas próximas para non perder o concurso Desfile de Estrellas, un popular espazo de Radio Nacional.
O encontro permitiu recuperar pequenas historias da vida cotiá que forman parte tamén da memoria colectiva da época. Todo o material recollido servirá para elaborar un podcast que poderá escoitarse proximamente na web de Radiofusión, a plataforma das emisoras municipais galegas.
O programa “Enterrar o espírito da guerra e os discursos do odio” trasládase este mércores ao CPI de San Sadurniño. Alí presentaránselle ao alumnado a banda deseñada A morte nas fragas e da curtametraxe Os fíos da memoria. Tamén se desenvolverá un obradoiro de creación de podcasts cos grupos de 3º e 4º da ESO, con participación de Ana Santiago, Anxos García Fonte, Quique Sanfiz e o historiador Roque Sanfiz.
A seguinte cita será este sábado. Ás 18:30 horas descubrirase na Casa do Concello unha placa cerámica en memoria das vítimas do golpe de Estado do 18 de xullo de 1936 e da ditadura franquista (1936-1975). O acto terá continuidade ás 19:00 horas na Casa da Cultura cunha charla sobre a sociedade de San Sadurniño entre 1900 e 1950.
O programa pecharase o luns 9 de novembro na Biblioteca Municipal cunha sesión do club de lectura arredor da obra A morte nas fragas. Asistirán o ilustrador Carlos Sardiña e a guionista Anxos García Fonte.
“Enterrar o espírito da guerra e os discursos do odio” é unha iniciativa do Concello de San Sadurniño coa colaboración de EMUGA e o apoio económico da Deputación da Coruña.
