En rolda de prensa, representantes sindicais detallaron as problemáticas que afectan á plantilla, incluíndo un "clima de acoso" cara ás delegadas, atrasos constantes no pagamento dos salarios, xornadas laborais que superan as nove horas sen os descansos regulamentarios e unha organización do traballo cualificada de "caótica".
“"Os Ventos prioriza o beneficio económico por riba das condicións laborais e da calidade asistencial."
A situación foi levada ante a autoridade laboral, e a Inspección de Traballo confirmou as irregularidades, obrigando á empresa a rectificar. Con todo, as denuncias non lograron frear o que o sindicato describe como un "clima de acoso e represalias" contra as delegadas sindicais, ás que se lles poñen atrancos no exercicio da súa representación legal e se lles somete a actitudes "intimidatorias".
Estímase que a plantilla da empresa nos concellos de Neda, Cariño e Fene rolda as 200 traballadoras, moitas das cales están de baixa por problemas musculoesqueléticos ou estrés psíquico. As modificacións constantes nos cuadrantes de traballo, a obriga de realizar servizos extra sen aviso e a falta de tempo para os desprazamentos entre domicilios son algúns dos puntos críticos sinalados.
“"Pídelle á empresa que se sente a falar e que deixe de pagar mal todos os meses. Paga tarde, mal e arrastra."
As representantes sindicais confirmaron que solicitarán reunións urxentes cos concellos afectados e non descartan mobilizacións se a empresa non se avén a negociar. A CIG comprométese a manter a "presión sindical" ata que a compañía "cumpra estritamente coas obrigas legais".
