O pleno do Concello de Narón aprobou onte unha moción, presentada por Terra Galega e apoiada por BNG e PSOE coa abstención do PP, para reclamar á Xunta maiores investimentos na cidade con cargo aos orzamentos autonómicos de 2027. As demandas inclúen a construción dun centro para maiores, a mellora de centros de ensino públicos, melloras viarias, a asunción da xestión das escolas infantís municipais pola Xunta e a creación dun centro integrado de Formación Profesional.
Tamén se aprobou unha moción do BNG en apoio á folga xeral do vindeiro 11 de novembro, baixo o lema “Galiza en loita por unha vida digna e polo dereito á vivenda”. A proposta, secundada por TEGA e PSOE, reclama medidas efectivas á Xunta e ao Goberno central para conter a emerxencia habitacional.
Abordouse unha declaración institucional sobre a necesidade de blindar e avanzar nos dereitos das vítimas de violencia machista, incidindo na proximidade do 25N e no compromiso das institucións públicas na erradicación desta violencia.
Ademais, aprobouse a declaración de especial interese das obras de ampliación do centro de saúde de Narón, o que permitirá unha bonificación do 95% no Imposto de Construcións.
O pleno tamén deu luz verde inicial ao regulamento de espectáculos públicos e actividades recreativas do Concello, que recolle requisitos administrativos, técnicos e de seguridade. O documento someterase a información pública durante trinta días.
Outras mocións aprobadas inclúen propostas do PSOE sobre a RPT e servizos públicos, e sobre a xestión da auga; de TEGA e BNG sobre a emerxencia lingüística do galego; do BNG sobre seguridade viaria no polígono das Lagoas; e do PP sobre mantemento de colectores urbanos.
