O proxecto, que xa vai pola súa décima edición co lema “Enreguéifate, construíndo patrimonio”, nace dos servizos de normalización lingüística de varios concellos galegos. A esta edición súmanse Narón e A Baña, elevando a oito o número de concellos impulsores, xunto a Ames, Arzúa, Carballo, Pontevedra, Santiago de Compostela e Teo.
A primeira actividade do curso será un obradoiro para docentes, que terá lugar o venres 23 de outubro, de 16:30 a 20:30 h, no Pazo da Cultura de Pontevedra. Conducido por Lupe Blanco, Josinho da Teixeira, Manolo Maseda e Séchu Sende, o profesorado aprenderá a empregar a regueifa como ferramenta didáctica para fomentar a expresión, a empatía e o traballo en equipo nas aulas, ademais de promover valores como a diversidade, a cooperación, a integración e o feminismo.
A sesión tamén servirá para facer balance do proxecto, que cumpre unha década. A participación require inscrición previa a través do formulario do Enreguéifate, aberta ata o martes 20 de outubro. Hai 45 prazas dispoñibles e, en caso de superar as solicitudes, terán preferencia os docentes dos concellos participantes e dos niveis educativos aos que se dirixe o proxecto: 5º e 6º de Educación Primaria e ESO.
O resto da programación da décima edición será anunciada nas próximas semanas. Para máis información, pódese contactar a través do correo electrónico info@enregueifate.gal ou no teléfono 686 679 897 (Elena Mareque).
