O autor Manuel González Gutiérrez presentou na igrexa de San Miguel de Aviño, en Valdoviño, a súa nova publicación titulada “La antigua feligresía de San Miguel de Aviño”. O acto contou coa presenza de numerosos veciños e veciñas da parroquia, que arrouparon ao autor na entrega de exemplares.
A obra busca conservar a memoria colectiva da historia local e concienciar sobre a importancia de preservar o patrimonio relixioso, un dos sinais identitarios da parroquia. Segundo explicou o autor, o libro naceu como resposta a un incidente ocorrido en setembro de 2021, cando se produciu unha intervención no chan do templo que afectou a unha zona de enterramento.
Tras comunicar os feitos á Dirección Xeral de Patrimonio da Xunta e ao Concello, a intervención foi paralizada, evitando danos maiores. Este suceso deu lugar a un traballo de investigación de cinco anos, con viaxes a arquivos e consulta de publicacións, co apoio da familia do autor e a cesión de imaxes por parte de veciños.
Ademais de centrarse na igrexa, o libro tamén recolle a historia máis recente da parroquia, incluíndo episodios como a capitalidade de Aviño en 1863, costumes, festas e lugares, co obxectivo de manter vivo o recordo.
