O suceso ocorreu na estrada de As Calvelas, a DP-7603, no quilómetro dous, cando ambos os vehículos circulaban pola vía. A Central de Emerxencias do 112 Galicia recibiu o aviso dun particular arredor das 19.00 horas, quen alertou de que o motorista non respondía tras saír despedido a causa do impacto.

Os servizos sanitarios de Urxencias Sanitarias-061 desprazáronse ao lugar do accidente, pero unicamente puideron certificar o falecemento do home. As causas exactas da colisión frontolateral que resultou fatal para o condutor da motocicleta están a ser investigadas polas autoridades.

No operativo de emerxencia tamén participaron efectivos do Grupo de Atestados da Garda Civil, unha patrulla de motoristas e axentes do posto de San Sadurniño, ademais dos Bombeiros do Eume e persoal de mantemento de estradas.