Os traballadores do centro loxístico de Pull&Bear, situado no polígono industrial de Río do Pozo en Narón, levan dúas semanas de protestas nas súas instalacións. A plantilla, cunha idade media que roza os 50 anos, denuncia o alto custo en termos de saúde laboral e a escasa inversión da multinacional nas súas dependencias.

Segundo un comunicado emitido polos empregados, o 32% da plantilla sofre algunha limitación médica que dificulta a realización das súas tarefas, e as baixas de longa duración por problemas musculoesqueléticos están en aumento. Por iso, consideran "vital" iniciar unha negociación con Inditex para establecer plans de prexubilación e un relevo xeracional que permita o "merecido descanso" dun equipo que contribuíu ao crecemento da compañía.

Os traballadores sinalan que, a pesar de que o conselleiro delegado de Inditex, Óscar Maceiras, anunciou en 2023 un plan de investimento de 2.000 millóns de euros para fortalecer as loxísticas en España entre 2024 e 2025, a inversión no centro de Narón "non se achega nin ao 0,10% dese orzamento". Isto é interpretado como un "duro golpe" para os empregados e unha falta de compromiso coa comunidade onde naceu a empresa.

No eido económico, a plantilla subliña que mentres Inditex rexistra beneficios récord, os seus salarios apenas crecen "ao ritmo do IPC". Nos últimos tres anos, o incremento salarial foi "só un 0,37% por riba do IPC", unha cifra que contrasta coa "remuneración desorbitada" da alta dirección. A empresa mantén unha proposta salarial "moi por baixo" do IPC actual e sen medidas de redución de xornada, puntos considerados "fundamentais" polos traballadores.

As mobilizacións, que xa se estenden por dúas semanas, non só buscan un "acordo digno", senón tamén chamar a atención sobre o impacto económico directo e indirecto que a falta de inversión de Inditex en Narón ten para toda a comarca de Ferrolterra, afectando a numerosas empresas locais.