O que debía ser unha celebración deportiva para nenos en categoría alevín na localidade coruñesa de Cedeira, converteuse o pasado sábado nun foco de tensión. Durante a disputa da Copa Convivencia no campo municipal Carme Maseda, produciuse unha denuncia por un suposto episodio de comentarios racistas, que xa está a ser investigado pola Garda Civil.
A situación provocou un intercambio de comunicados entre os clubs implicados, institucións e asociacións deportivas. Mentres algúns rexeitan rotundamente calquera acto racista, o C.D. As Pontes emitiu un comunicado defendendo ao seu adestrador, ao que se lle atribúen os comentarios, e apelando á presunción de inocencia.
O club anfitrión, Cedeira S.D., foi o primeiro en reaccionar cun comunicado titulado 'O racismo non ten cabida no fútbol', no que expresou a súa "máis firme condena e rexeitamento" ante os feitos, cualificándoos de "inaceptables" e contrarios aos valores da entidade. Subliñaron que "en Cedeira S.D. non hai lugar para o racismo nin para ningún tipo de discriminación" e comprometéronse a traballar para erradicalo.
O Concello de Cedeira tamén mostrou o seu apoio ao club local, rexeitando "calquera comportamento racista, xenófobo ou violento no deporte". O goberno municipal destacou que a práctica deportiva debe ir acompañada de "comportamentos éticos", como o respecto ao contrario, ás normas e o xogo limpo.
Pola súa banda, o C.D. As Pontes, aínda que declara "tolerancia cero" fronte ao racismo, defende ao seu adestrador. O club asegura que abriu unha investigación interna pero afirma que "a día de hoxe non existe ningunha proba obxectiva que acredite que tales comentarios se produciran". Destacan a traxectoria do técnico, "que leva anos formando nenos e nenas de todas as razas, nacionalidades e relixións", e apelan á presunción de inocencia, anunciando accións legais contra quen difunda "odio e xuízos sen fundamento" nas redes sociais.
O Racing San Pedro, club de Ferrol, pronunciouse denunciando unha situación recorrente: "Levamos toda a tempada sufrindo racismo". Repudian "enérxicamente calquera acto de racismo, discriminación ou xenofobia" e amosan o seu apoio aos xogadores e familias afectadas, afirmando que "seguiremos traballando para erradicar calquera forma de discriminación dentro e fóra do campo".
