O porto exterior de Ferrol convértese na porta de entrada europea para o xigante automotriz chinés SAIC. O mércores atracou o buque Anji Forever, procedente de Shanghái, transportando os primeiros 700 vehículos da marca MG, que xa foron desembarcados e aliñados nunha campa de case 20.000 metros cadrados.
Esta operación, que culmina hoxe, supón un ensaio xeral para a futura planta de ensamblaxe que a multinacional prevé instalar na comarca. O obxectivo é avaliar a loxística portuaria, a eficiencia das operacións de estiba e a capacidade da rede viaria para o transporte dos vehículos. Un equipo de 45 traballadores participou neste operativo.
O presidente da Xunta, Alfonso Rueda, acompañado pola conselleira de Economía e Industria, María Jesús Lorenzana, presidiu o acto institucional desta recepción histórica. O plan a longo prazo de SAIC inclúe converter Caneliñas nun hub de distribución, coa chegada dun barco mensual, e posteriormente establecer unha planta de ensamblaxe que, para 2031, producirá 120.000 vehículos eléctricos e híbridos anuais co selo "made in Galicia".
Este desembarco representa unha oportunidade sen precedentes para o mercado laboral de Ferrolterra, coa previsión de crear 540 empregos en Produción e 460 en Logística. A comarca xógase o seu futuro industrial neste proxecto que busca converter Ferrol na cuna da expansión europea da automoción chinesa.
