A batalla política en Ferrolterra centrouse este venres nos investimentos industriais e militares. O PSOE local saíu ao paso das críticas do BNG e do Partido Popular, defendendo os proxectos do Executivo de Pedro Sánchez e tachando de "incoherentes" e "hipócritas" as posicións nacionalistas.
A deputada no Congreso Obdulia Taboadela denunciou a "inconsistencia" do PP e a "incoherencia" do BNG, criticando que os nacionalistas pidan a cancelación de proxectos de defensa mentres presentan iniciativas para Navantia que o Estado xa está a executar. Taboadela defendeu a compatibilidade do gasto militar co benestar social.
O secretario xeral socialista, Anxo Mato, cualificou a estratexia do BNG como un "exercicio de equilibrismo político indecente". Aféoulles que se opoñan á eólica mariña e voten en contra de orzamentos de defensa mentres reclaman carga de traballo para os estaleiros. "Pedir que se manteña a construción das fragatas F-110 e por outra banda esixir que se reduzan eses investimentos é unha hipocrisía absoluta", sentenciou.
Mato cifrou en máis de 10.000 millóns de euros as partidas activadas polo Estado na zona, destacando o novo buque BAN, os accesos ferroviarios ao porto, a transformación das Pías e a futura fábrica de vehículos eléctricos da chinesa SAIC en Ferrol.
Os dirixentes socialistas tamén cargaron contra o PP, dirixindo os seus ataques cara ao vicesecretario de Organización nacional, Miguel Tellado. Taboadela reprochoulle a defensa de Navantia cando o seu partido, segundo ela, só deixou "desinvestimento, desemprego e falta de oportunidades" na comarca.
Respecto ao acordo de saneamento entre os concellos de Ferrol e Narón, Anxo Mato cualificou o anuncio de "esperpéntico". Ironizou co feito de que se chame "fito histórico" a un pacto forzado por unha sentenza xudicial e lembrou que foi o PSOE quen impulsou o proceso para recuperar máis de 5 millóns de euros cobrados de máis aos cidadáns de Ferrol. Mato criticou o aumento do 40% no prezo da auga polo goberno popular e esixiu que Emafesa sexa unha empresa 100% pública.
