A competición, que se estendeu durante 24 horas e rematou o pasado venres nas instalacións do estaleiro ferrolán e centros universitarios, puxo a proba a capacidade de innovación de mozos talentos. O equipo gañador está composto por Miguel Nistal, Martín González, Ana Sande, Yared Grimaldi e Valentina Ozón.
O galardón inclúe unha bolsa de formación dun ano en Navantia, o que lles permitirá desenvolver e perfeccionar o seu proxecto. A cerimonia de entrega contou coa presenza de destacadas personalidades como Ana Ares, vicerreitora do Campus de Ferrol; Eduardo Dobarro, director do estaleiro de Ferrol; e Carlos Blanco, director de I+D+i de Navantia, entre outros.
Este evento consolídase como unha oportunidade clave para a experimentación en transformación dixital e tecnoloxías SmartTech aplicadas a necesidades reais da fábrica.
O desafío proposto por Navantia centrábase na mellora da seguridade dos operarios en traballos sobre bloques invertidos, buscando solucións para facilitar a mobilidade e superar obstáculos. Un total de 35 participantes, distribuídos en 7 equipos multidisciplinares da Escola Politécnica de Enxeñaría de Ferrol (EPEF) e da Escola Universitaria de Deseño Industrial (EUDI), traballaron intensamente neste reto.
Durante a maratón tecnolóxica, que se desenvolveu dende as 14:30 horas do xoves ata a mesma hora do venres, os equipos contaron co apoio de mentores especializados e recibiron charlas motivacionais de Diego Marqueta e Teresa Galdo, responsable de relacións con universidades de Navantia.
