O festival, que combina obradoiros teatrais e espectáculos, contará coa participación de tres profesionais de recoñecida traxectoria na creación e interpretación de producións innovadoras. As actividades están abertas a todo o público interesado nas artes escénicas, non só a profesionais ou estudantes.
A xornada inaugural deste domingo acollerá, ás 18.00h na praza Roxa, diante da sala Áncora, o espectáculo de danza "Nexos" da compañía coruñesa Exire. Esta peza, gañadora do premio á mellor coreografía no 18 Festival DZM de Cáceres, explora a complicidade e as memorias compartidas entre dúas persoas.
A partir do 17 de outubro, abrirase a inscrición para os obradoiros. Os días 17 e 18, Helen Baggett impartirá un taller de “Teatro físico”. Os días 22 e 23, Rachel Bown Williams dirixirá un obradoiro sobre “Combate escénico: coreografía con espadas”, e Antonio Gil ofrecerá a actividade “O coro: crear en grupo”.
O calendario tamén inclúe dous encontros. O venres 16 de outubro, ás 11.00h no Auditorio, proxectarase a peza audiovisual “The Time of Your Life” da compañía Gecko, centrada na busca de conexión humana nun mundo dixital. Ao finalizar haberá un coloquio aberto ao público e ao alumnado do IES Punta Candieira. O mércores 21, Antonio Gil manterá un encontro co alumnado do obradoiro no mesmo IES.
Complementando estas actividades, o Concello de Cedeira presenta outros espectáculos. O venres 16, ás 20.00h no paseo da Mariña, Raquel Ferradás e María de Vicente presentarán a proposta escénica de rúa “Diz-me meu amor”. O sábado 17, ás 20.00h no Auditorio, a compañía Morraoconto porá en escena “Tromso”, un proxecto multidisciplinar. O festival rematará o sábado 24 coa peza de danza “Vicenta Lorca” da compañía Óscar Cobos.
Para máis información, pódese contactar por whatsapp ao número 649876614 ou por correo electrónico a enrique.vazquez@cedeira.gal. As inscricións nos obradoiros realízanse a través da sede electrónica do Concello.
