A actuación, levada a cabo polos Bombeiros no número 5 da rúa Real, foi asumida de forma subsidiaria pola administración local para garantir a seguridade cidadá. Esta medida prodúcese tras anos de incumprimentos por parte dos propietarios do inmoble, segundo informaron fontes municipais.

A alerta saltou arredor das 9:00 horas do sábado, cando un particular informou á Policía Local do desprendemento. Inmediatamente, a concelleira de Urbanismo, Blanca García, xunto co director de Urbanismo e o xefe da Oficina Técnica, desprazáronse ao lugar para avaliar os danos e coordinar as tarefas de emerxencia.

Desde o Consistorio lembraron que a situación de abandono do edificio non é nova. O Concello xa notificara á propiedade o pasado 26 de novembro de 2025 a súa intención de solicitar unha orde xudicial para acceder ao inmoble e determinar as actuacións necesarias. Esta decisión tomouse despois de realizar ata cinco visitas de inspección desde outubro de 2020, sen que os donos adoptasen ningunha das medidas de mantemento esixidas.

Ante o risco inminente detectado, os Bombeiros procederon ao desmantelamento total dos elementos inestables da galería. A complexidade dos traballos obrigou a cortar o tráfico rodado a partir das 13:00 horas e a establecer un desvío alternativo a través do túnel de A Graña.

Os traballos finalizaron arredor das 15:00 horas, momento no que o edificio quedou fóra de perigo e se restableceu a circulación con normalidade tras a retirada dos escombros pola empresa Urbaser. O Concello quixo destacar e agradecer a “rapidez de actuación e a colaboración constante” da Escola de Especialidades da Estación Naval de A Graña (Esengra), que facilitou en todo momento o desvío do tráfico a través das instalacións militares para minimizar o impacto na mobilidade da zona.