A formación nacionalista sinala que as incidencias nesta infraestrutura son recorrentes e denuncian dende hai anos a falta de investimento necesario para a súa modernización. O texto presentado na Cámara baixa pon o foco no fallo técnico ocorrido o pasado 29 de xuño, que afectou a un dos convois que realizan este percorrido.
Ademais desta última avaría, a formación lembra que o pasado 21 de abril se produciu outro incidente grave na mesma liña, concretamente no tramo entre Ferrol e Ortigueira. Aquela incidencia, provocada por un incendio na cabina do tren, obrigou a paralizar o tráfico ferroviario durante a xornada.
O BNG reclama un balance detallado de todas as incidencias rexistradas nesta liña de ancho métrico, co obxectivo de coñecer o estado real do servizo e as medidas que se van adoptar para garantir a seguridade e a fiabilidade do transporte ferroviario na zona.
