O acto institucional, celebrado no salón de plenos provincial, serviu para recoñecer o fito deportivo do club, que logrou o pase á elite tras unha destacada actuación na fase final disputada en Gran Canaria. O equipo proclamouse subcampión da Superliga 2, garantindo así a súa presenza na máxima competición a próxima tempada.

Durante a recepción, os representantes da Deputación destacaron a importancia deste logro para un municipio de menos de 3.000 habitantes. Subliñaron que o éxito do club é froito dun proxecto consolidado durante máis de tres décadas, baseado no traballo de canteira e no apoio constante da afección local.

Ademais do primeiro equipo, a institución provincial puxo en valor o traballo nas categorías inferiores. O club conta con éxitos recentes como os campionatos galegos acadados polos equipos infantil e benjamín, o que garante o futuro da entidade e a solidez da súa estrutura deportiva.