O Concello de Narón pon en marcha dúas novas iniciativas sociosanitarias gratuítas: as Aulas de Benestar, dirixidas a mulleres, e o programa Saúde Activa, enfocado a persoas con enfermidades crónicas. Ambas as actividades darán comezo en outubro e estenderanse ata xuño de 2027.
As Aulas de Benestar centrarase na saúde emocional, habilidades sociais e autocoidado, abordando temas como a xestión emocional, a autoestima, o pensamento crítico e a perspectiva de xénero. Ofreceranse en tres grupos con prazos distintos: martes de 10:00 a 12:00 e de 16:30 a 18:30 no centro cívico social de Virxe do Mar, e mércores de 19:00 a 20:30 na Casa da Mocidade. Hai 36 prazas dispoñibles para mulleres empadroadas en Narón de entre 18 e 60 anos.
Pola súa banda, o programa Saúde Activa propón actividade física adaptada para persoas con enfermidades crónicas, combinada co traballo de habilidades sociais e xestión emocional. Realizarase en tres quendas de martes e xoves: de 12:00 a 13:00 no centro cívico social de Virxe do Mar, e de 18:00 a 19:00 ou de 19:00 a 20:00 na Escola de Domirón. Cada grupo conta con 12 prazas para persoas maiores de 18 anos empadroadas en Narón que padezan algunha doenza crónica.
As solicitudes poden presentarse a través da sede electrónica do Concello ou presencialmente no Rexistro Xeral ata completar as prazas. As persoas seleccionadas serán contactadas telefonicamente. Para máis información, pódese chamar ao 981 337 700, extensións 1108, 1109 e 1125.
“"A Escola de Benestar naceu para chegar a persoas que moitas veces non atopan na oferta habitual un espazo pensado para elas. As Aulas de Benestar e o programa Saúde Activa son dous exemplos do que queremos facer: actividades gratuítas, en horarios accesibles e cun enfoque integral que vai máis alá do físico."
A concelleira de Benestar, María Lorenzo, animou as persoas interesadas a formalizar a súa inscrición a partir deste mércores.
