A empresa derivada Motion and Force Engineering Solutions (MFES), vinculada á investigación en biomecánica do Centro de Investigación en Tecnoloxías Navales e Industriais (CITENI), recibiu dous importantes recoñecementos á innovación. Por unha banda, foi distinguida nos Santander X Spain Awards na categoría Startup Universitaria 2026, un galardón convocado pola UDC que inclúe 4.000 euros e a posibilidade de participar na final nacional.
O premio foi entregado o pasado xoves 22 de outubro, durante a feira de emprego IMPULSA-T: Salta da UDC ao futuro, en Ferrol. Eloy Vázquez, director executivo de MFES, recolleu o galardón en representación do equipo investigador, que tamén inclúe a Florian Michaud, Urbano Lugrís e Javier Cuadrado, vinculados á Área de Biomecánica do Laboratorio de Enxeñaría Mecánica (LIM) do CITENI.
Ademais, o dispositivo portátil AppGym de MFES obtivo o segundo premio na Jornada de Innovación en Industria de Maker Faire Galicia 2026, celebrada o venres 9 de outubro na Casa das Máquinas de Santiago de Compostela. Este recoñecemento está dotado con 375 euros.
AppGym é un dispositivo deseñado para monitorizar a flexión lumbar en tempo real mediante dous sensores inerciais (IMU) situados na espalda. Estes sensores transmiten datos por bluetooth a unha aplicación que permite visualizar os movementos e identificar patróns de risco, coa colaboración da Clínica Arriaza da Coruña. As súas aplicacións abranguen a práctica clínica, o deporte e a avaliación de riscos ergonómicos laborais.
MFES tamén desenvolve solucións noutras áreas da biomecánica, como a análise da marcha e a modelización musculoesquelética, contribuíndo á transferencia do coñecemento universitario a solucións tecnolóxicas para necesidades sociais e produtivas.
