Durante o foro, organizado por Entre Culturas, mozos de diversas nacionalidades buscaron solucións a desafíos que os afectan directamente, como a migración, a igualdade e o cambio climático. As participantes, procedentes de Ferrol, compartiron as realidades do seu contorno máis próximo, achegando unha perspectiva local a un debate de alcance global.
“"Para a entidade, fundada por mulleres migrantes, é unha conquista amorosa poder levar as voces das mozas adolescentes migrantes do territorio español a un foro europeo, dándolles un espazo para o seu corpo e realidade."
As participantes valoraron a experiencia como moi enriquecedora. Unha delas, Jireh, destacou o bo trato recibido en Ferrol e a oportunidade de coñecer diferentes perspectivas sobre a migración. Pola súa banda, Katia subliñou o interese de descubrir os movementos sociais existentes nos países latinos mentres residen en España.
Entre as principais preocupacións abordadas no encontro, destacaron a desinformación, o racismo e a necesidade de regularización. Baixo o lema “Eu non son fake”, os mozos traballaron o pensamento crítico para combater os bulos, poñendo como exemplo a nova lei de regularización de migrantes. Scarlet explicou como moitas noticias falsas buscaban alarmar, afirmando que a lei non sería aprobada.
Outra das dificultades inmediatas que afrontan é o racismo. Unha das mozas sinalou a urxencia de cambiar o trato cara aos estranxeiros, mencionando situacións de discriminación por cor de pel ou forma de falar. Relataron casos de persoas do seu contorno acusadas de roubar en supermercados ou miradas de desconfianza na rúa.
“"Falamos dunha educación que sexa accesible, dunha sanidade, dunha vivenda e dunha documentación. É indispensable escoitar todas as voces para construír unha sociedade mellor."
