O incidente tivo lugar arredor das 12:30 horas na rúa Médico Cebreiro (AC-115), á altura do número 51, fronte á gasolineira Repsol. Segundo informaron o corpo de extinción mugardés e o Centro Integrado de Atención ás Emerxencias-112, a rotura produciuse cando uns operarios, que realizaban catas para verificar que unhas obras non afectasen os servizos da estación de servizo, perforaron accidentalmente unha canalización soterrada.

A canalización, que non figuraba nos planos orixinais da estrada, albergaba o tendido eléctrico. Ao seccionar o cable, escoitouse un ruído seco e moi intenso, semellante a unha explosión, o que inicialmente fixo sospeitar aos profesionais dunha posible fuga de gas. Ante esta situación, os operarios alertaron de inmediato á central autonómica, que desprazou ao lugar unha dotación do GES e efectivos da Policía Local.

Unha vez no punto, e tras as comprobacións pertinentes, o corpo mugardés confirmou que non había fuga de gas. Pola contra, do burato saían "faíscas" ata que se procedeu ao corte do subministro enerxético. Como consecuencia do suceso, varias vivendas da zona quedaron sen electricidade de forma temporal.

O 112 notificou o incidente á compañía responsable do servizo, Naturgy, que enviou unha cuadrilla de técnicos para reparar a avaría e restablecer o subministro eléctrico na área afectada.