O Servizo Galego de Saúde (Sergas) investirá 1,4 millóns de euros no subministro de material e dotación de novo equipamento para o laboratorio de Microbioloxía do Complexo Hospitalario Universitario de Ferrol. Este contrato, cunha duración inicial de 36 meses e posibilidade de prórroga por 24 meses máis, podería alcanzar un valor estimado de 2.078.153 euros.
A contratación inclúe a renovación e actualización de equipos automáticos de última xeración para a realización de antibiogramas (sensibilidade aos antibióticos) e para a identificación bacteriana rápida mediante espectrometría de masas. Tamén se renovará o material de tinguidura, incorporando vantaxes ecolóxicas pola redución de reactivos.
Como novidade, incorporarase unha nova sementadora de mostras que automatizará tarefas repetitivas. Para a súa instalación, realizarase unha pequena intervención de adaptación nos espazos do laboratorio.
“"Teremos a última xeración de equipamento, e incorporaremos unha automatización de accións mecánicas que facían os técnicos, que agora poderán asumir outras funcións e incrementar a carteira de servizos."
O Servizo de Microbioloxía realiza entre 7.000 e 8.000 probas ao mes na área de Ferrol, principalmente de ouriños e feridas, para detectar infeccións bacterianas. A actualización tecnolóxica permitirá unha identificación máis rápida e efectiva das bacterias e a aplicación de terapias axeitadas.
O laboratorio, situado no Hospital Naval, tamén se dedica ao seguimento de enfermidades infecciosas, control de resistencias a antibióticos, estudos virolóxicos (VIH, hepatite, papiloma, gripe, covid) e análise da tuberculose. Conta cunha área de bioloxía molecular e funciona as 24 horas, cun equipo de 30 profesionais.
Este servizo foi acreditado para a docencia en xullo de 2021 e conta coa certificación ISO desde o ano 2012, o que garante os máximos estándares de calidade nos seus procesos.
