A conselleira de Vivenda e Planificación de Infraestruturas, María M. Allegue, presentou hoxe esta nova promoción, destacando que o 30% das vivendas se destinarán a familias de entre 36 e 45 anos con fillos, e o 25% a menores de 36 anos.
A conselleira sinalou que as vivendas serán destinadas á compra e contarán maioritariamente con 2 e 1 dormitorios, para adaptarse á maioría dos inscritos no rexistro de demandantes, que corresponden a unidades familiares de 1, 2 e 3 membros.
As 75 vivendas distribuiranse en 3 bloques lineais, de planta baixa e 5 alturas. Serán fogares luminosos, accesibles e sostibles, con especial coidado nos espazos exteriores, percorridos peonís e zonas abertas para a convivencia dos usuarios.
Na construción das fachadas empregaranse técnicas industrializadas, un modelo polo que a Xunta aposta para reducir tempos de execución e gañar eficiencia enerxética e medioambiental, xa que o illamento térmico e acústico é superior á construción tradicional.
Os traballos de construción terán un prazo de execución de 20 meses. Con esta nova promoción, en Ferrol xa estanse a executar 123 fogares públicos, dos cales 48 xa teñen adxudicatarios provisionais. O resto, 230, teñen obra adxudicada ou licitada.
