A nave industrial que albergou a empresa Rubber en Fene, dedicada ao recauchutado de pneumáticos e pechada dende o ano 2000, será rehabilitada pola compañía Glekom. Esta empresa, especializada en carpintería metálica para edificación, obtivo a licenza municipal o pasado 7 de maio para iniciar a recuperación deste espazo, que leva máis dun cuarto de século en desuso.

As obras, que comezaron o xoves 21 de maio, transformarán o complexo no futuro Centro Industrial Glekom. Este novo espazo, cunha superficie produtiva de máis de 5.000 metros cadrados dentro dun ámbito total de 22.000 m², estará orientado á produción industrial para a envolvente arquitectónica. As instalacións funcionarán con enerxía eléctrica 100% renovable e buscarán unha produción de alta precisión cunha baixa pegada ambiental.

O proxecto integra capacidade produtiva, loxística e unha área de investigación aplicada en fachadas, peches e construción industrializada. A empresa prevé trasladar as súas actuais dependencias a esta nova sede a finais deste ano. Dende Glekom destacan que a actuación aposta por un modelo de "reindustrialización contemporánea e vinculado ao desenvolvemento tecnolóxico", reutilizando un solo xa transformado.

A posta en marcha deste centro xerará emprego cualificado e contribuirá a reforzar o posicionamento de Ferrolterra como polo industrial e tecnolóxico. Aínda que non se concretou o número exacto de traballadores, a empresa xa foi recoñecida pola Xunta de Galicia como Iniciativa de Emprego de Base Tecnolóxica (IEBT) en 2021 e recibiu apoio financeiro do IGAPE.