A iniciativa "Sete Cidades, Sete Sabores", impulsada por Turismo de Galicia, busca potenciar o turismo urbano e gastronómico na comunidade. Sete cociñeiros, un por cada urbe galega, enfrontaranse na Cidade da Cultura para alzarse co galardón outorgado por un xurado profesional e polo público asistente.

A proposta de Pérez para representar a Ferrol é a "Merenda do Patrón", unha tapa que evoca as festas patronais da súa infancia, mesturando o doce e o salgado. Combina unha base de masa doce tipo choux, rechea de rabo de vaca galega estofado a baixa temperatura, e está cuberta con teriyaki de pementos de Piñeira e unha emulsión de cenoria ecolóxica.

O chef Adrián Pérez, formado na Escola de Hostalaría de Pontedeume e con experiencia en recoñecidos establecementos como O Camiño do Inglés, xa foi recoñecido en 2024 co premio do público nesta mesma gala, o que avala a súa traxectoria e creatividade culinaria.

Xunto a Pérez, competirán outros seis chefs: Rubén González (El Cafetín, Pontevedra); Carlos Montes (La Sifonería Gastrobar, A Coruña); Rodrigo Seoane (ArteSana Gastrobar, Santiago); Rebeca Guede (La Orensana, Vigo); Beatriz Alcalá (La zapatería del abuelo, Ourense); e José Luis Pardo (El Boni, Lugo).

A gala, que chega á súa décima edición organizada pola Xunta de Galicia, outorgará dous premios: o do xurado profesional e o do público, que poderá votar mediante televoto. Valoraranse aspectos como a complexidade técnica, a creatividade, a presentación e o sabor de cada proposta.

Esta iniciativa busca atraer visitantes durante todo o ano, fomentando as escapadas baseadas en experiencias gastronómicas auténticas, que poñan en valor o produto de proximidade e a cultura local galega.