As organizacións Ferrol en Común e CCOO de Industria emitiron sendas notas de prensa para rexeitar "rotundamente" unhas afirmacións do presidente de Navantia, Ricardo Domínguez, que consideran "profundamente erróneas e preocupantes". En concreto, ambas organizacións reprobaron que Domínguez abrira a porta a unha posible entrada de capital privado na empresa pública durante un foro organizado en Bilbao por Deusto Business e PKF Attest.

Ferrol en Común advertiu de que falar de privatización supón priorizar a rendibilidade económica por riba do emprego, das condicións laborais e do futuro industrial da comarca. "Ferrol xa coñece as consecuencias de décadas de desmantelamento industrial", sinalaron.

Pola súa banda, Víctor Ledo Suárez, responsable estatal do sector naval de CCOO Industria, denunciou que a subcontratación masiva que xa existe en Navantia constitúe "unha privatización encuberta" de boa parte da actividade. Ao seu ver, as declaracións de Domínguez son "un intento de xustificar problemas de xestión" e resultan "insultantes" cando se fala de falta de talento ou de dificultades técnicas, xa que, segundo apuntou, "o anterior Plan Estratéxico incluía medidas de formación que nunca se levaron a cabo".

Ambos colectivos coincidiron en esixir o reforzo da empresa pública, máis investimento —como a construción do dique en Ferrol—, a negociación inmediata do Plan Estratéxico 2026-2029 e o desbloqueo do convenio colectivo, asinado o pasado decembro e pendente de aspectos chave como os contratos de relevo ou a clasificación profesional.

Fontes da empresa matizaron este martes as palabras do seu presidente. Así, Navantia indicou que, "con respecto ás palabras do presidente de Navantia nun foro, recollidas por distintos medios, cómpre aclarar que se trataba dunha reflexión cara ao futuro no contexto da industria en Europa, pero non é un escenario que se estea a plantexar neste momento". A compañía subliñou que a intervención se produciu "en resposta a unha pregunta que lle fixeron no foro". A pesar desta matización, os críticos insistiron en que calquera debate sobre privatización é "inaceptable" e "máis aínda tendo en conta que Navantia pertence á SEPI e forma parte dun Goberno de esquerdas que supostamente defende a empresa pública".