O evento desenvolverase entre as 09:30 e as 14:00 horas, coas probas no Pabellón Municipal de Esteiro e a posterior entrega de premios no Salón de Actos Concepción Arenal do Campus Industrial de Ferrol.

Sete centros educativos terán representación nesta edición: IES Saturnino Montojo, IES Ricardo Carvalho Calero e Colexio Tirso de Molina de Ferrol; IES As Telleiras de Narón; IES Fin do Camiño de Fisterra; CPR Fonteboa de Coristanco; e IES Perdouro de Burela.

Os participantes, distribuídos en 33 equipos (oito na Categoría Promesas para 1º e 2º de ESO, e 25 na Categoría Elite para 3º e 4º de ESO), deberán demostrar as súas habilidades en programación e enxeñaría a través de tres desafíos técnicos.

O primeiro reto é unha proba de segue-liñas con obstáculos, onde os robots autónomos terán que seguir un trazado impreso e esquivar as barreiras físicas. A segunda proba, coñecida como “barrendero”, simula o funcionamento de aspiradoras ou cortacéspedes intelixentes, requirindo algoritmos para que as máquinas despracen obxectos dun taboleiro. Finalmente, a competición culminará cunha proba de sumo, un enfrontamento entre robots co obxectivo de expulsar ao opoñente da área de combate.

A organización outorgará un total de 12 premios, dous por cada reto e categoría. Ademais, concederanse dous galardóns especiais aos equipos con maior puntuación global nas tres probas, un para a Categoría Promesas e outro para a Elite.