Este evento, sen precedentes na cidade, enmárcase nos actos conmemorativos do 300 aniversario da designación de Ferrol como departamento marítimo. A xura, descrita polo alcalde como "de fonda carga simbólica e emocional", ofrecerá aos cidadáns a oportunidade de expresar publicamente o seu compromiso co Estado.

As persoas interesadas en participar poderán inscribirse na oficina delegada de Defensa en Ferrol, situada na rúa Cuntis, número 26, ou descargar a solicitude correspondente a través da páxina web do Ministerio de Defensa. O Concello habilitará zonas específicas para que os asistentes poidan presenciar o acto e "representar o seu vínculo cos valores constitucionais e coa propia nación española", segundo declarou o Almirante Xefe do Arsenal de Ferrol, Vicente Rubio Bolívar.

O alcalde, José Manuel Rey, lembrou que esta iniciativa forma parte da celebración dos tres séculos desde que en 1726 se estableceu un dos principais departamentos marítimos da Coroa, marcando o destino de Ferrol como un centro estratéxico naval de España. Destacou o papel fundamental da Armada no desenvolvemento económico e social da cidade.

Rey Varela tamén agradeceu á Armada e ao Almirante Rubio Bolívar a posta en marcha desta iniciativa e o seu "compromiso continuo" con Ferrol, cualificando a oportunidade de realizar a xura na Praza de Armas como "un marco tan incomparable" e "o corazón da cidade".

O Almirante Xefe do Arsenal sinalou que se trata dun "acto militar, solemne, que permite aos cidadáns expresar a súa fidelidade e lealdade a España a través do maior signo da nación que é a súa bandeira", e animou á poboación a participar. Estableceuse un límite máximo de 250 participantes, con posibilidade de ampliación se a demanda o require.